لهذا أحمد الله كثيرا وأمتن له

  

عدسة المصور محسن الوردانى

 

نشرت هذا النص 3-9-2007

كنت وقتها أعانى من سكنى البعيد عن مقر عملى بالإضافة لأصطحاب أبنتى الرضيعة معى كل يوم فى رحلة العمل ، وكانت ظروفى المادية ضيقة جدا 

الأن وبعد مرور سنوات من الشقاء والالم والوحدة والضيق وفى تاريخ هذا اليوم 11-6-2015

لا يسعنى إلا أن أقول أن الله أحبنى ، ووهبنى كل ما مررت به وهو يتأبط ذراعى كما اعتادت ان اقول عنه ، وأنه رغم كل ما عانيت أصبحت أفضل وسعيدة لحد أن أقول 

أحمدك يا حبيبى وأشكرك على فضلك على 

واليكم نص من الماضى

----------------

الفقير ،أو يعنى المتوسط او يعنى اللى ممكن يكون بيشتغل مع الحكومة

لما يعيا لما يحب لما يكون عايز يربى ولاده لما يتمنى يعيش عيشة حلوة يموت يموت يموت
احسن له بلا قرف هى ناقصة بنى أدمين
والنبى اللى عنده نصيحة من شأنها تفيدنى للوصول للعالمية

كأم وكأب وكأبنة وكأنسان يقولى ...
لأنى بصراحة ماشية كدا بالفطرة مع شوية نصاحة واحساس

ومتهيألى انهم مش كفاية مع الناس ، الا لو اتحولوا كلهم زى ماشين بوقود الاحساس

وانا عارفه انه مستحيل ، بالله عليكم سؤال مهم جاى اهه بس لانه طويل شوية اصبروا معايا ومتتخنقوش ...
أصحى الصبح الساعة 7.30 أنزل الساعة 8.30 أنا ونهنوه الصغنن بعدما نكون استحمينا وقعدنا عكينا فى الاكل بتاعها وتكون اثبتت وجودها فى كل مكان فى الشقة ،

فننزل بقى نطلع من ش الصفا والمروة بالتكتوك انا وهى لأن مفيش مواصلات اساسا بتطلع على ش فيصل ،

وبعد ما نطلع عل الشارع العمومى بالتكتوك ، نقف نشرب عصير من عند اللورد ،

عصير قصب لانها بتحبه قوى زى ما تحب الفول والكيك قوى قوى ،

وبعدين نعدى الناحية التانية نفضل رايحين جايين ان يقف ميكروباص ياخدنا حتى لغاية الكوبرى الخشب

- مترو – مفيش
وبعدين نركب واحنا مفرهضين من المشورة فى نفس المكان اى حاجة تخرج بينا من الحتة دى ،

ومن التعاون لاول فيصل بالضبط تقريبا ساعة وفى الزحمة الاوى بتبقى اكتر من ساعة ،

فين وفين على ما نوصل التحرير دا لوركبنا تحرير مش مترو ،

ننزل اركب ميكروباص نازل رمسيس ننزل عبد الخالق ثروت نمشى لغاية المعبد اليهودى مكان حضانة نهنوه أو نركب تاكسى لغاية هناك ب2 د ج لو الامور تمام ،

بعد كدا اروح الشغل ويعدى اليوم ،

أرجع على نهنوه أما مشى حسب الحر وحسب الجيب او بتاكسى ب2 ج برضه ،

اروح اخد نهنوه ، جاية تجرى عليا ، ماما ، مامى على حسب مزاجها كل يوم ،

فهى يوم تقولى مامى ويوم تقول ماما ويوم تقولى سهى كدا من غير القاب ...

تفتكروا نروح على طول مش نهدى شوية ، نروح هنا هنا ،

خاصة لما يكون لسة هانمشى للعتبة او للتحرير عشان نركب مترو لمحطة فيصل ،

ونعدى نركب الميكروباص اللى هايودينا للتكتوك ،

فنوصل البيت شبه مقتولين من رحلة العذاب والضنا ،

تفتكروا ممكن حد فينا انا وهى نعمل حاجة لما نروح ، ومع ذلك بنعمل ، هى بتفضل تقرف فيا وتزهق فى امى ، ماما ايه دا ماما خدى ماما هاتى ورايح جاى وراها لغاية ما هى تتهد يا عينى وتنام من الساعة 9 مساءا

وسبحان الله البنت ضبطط نومها لوحدها من غير اى معاناة منى

ما هى بصراحة مش ناقصة معاناة ضبط مواعيد النوم كمان ،

وبقت على كدا كل يوم نوم 9-10 بالكتير تكون مقلوبة على الارض على بطنها زى القطة السيامى الحرانة ،

اقوم شايلها انيمها على السرير وانسى بقى انها نايمة ،

الا لما تتقلب وتقول ماما .. وتنام تانى ، بعد اليوم دا ممكن اعمل ايه تفتكروا ،

ايوا محدش يفتح بقه انا عارفه ـ

اغسل بقى الغسيل اللى فى الغسالة واقعد اخلص كتاب نائل او محمد او زوسكيند او اى حاجة جديدة ،

وخلاص كفاية ، لأ ، افتح الكمبيوتر اللى لسه مبقاش نت ،

واكتب بوست او اشتغل فى الرواية او اكتب شغل محمد بكر اللى سايبه بخط أيده ،

اه نسيت صحيح أقولكم ان فى ايام بنقعد فيها انا ونهى فى الشارع مضطرين لاكثر من سبب ،

ان مفيش أو مستنين حد هايجيب حاجة ليا أو هاشوف حد اديله حاجة لمحمد أو اشوف اصحاب يمكن مشفهمش تانى ، كلها اسباب هاتخلص مع الوقت ، وبتكون يوم او يومين فى الاسبوع ، المهم انا وحبيبتى مع بعض 24 ساعة ، باين انا فى سؤال كنت هاسأله ، اه بالمناسبة عندى شوية أسئلة مهمة جدا عايزا اجابة عليه :
هى الام المثالية شكلها ايه
هو الاب المثالى بيعمل ايه
هو الابن المثالى سلوكه ايه
هى الابنة المثالية بتعمل ايه
هو الأنسان المثالى عموما
مثالى ليه وازاى وعامل ايه

سنين ومرت

عندما تجلس بالساعات وحيدا وحتى وأنت برفقة الناس المقربين ، لاتتكلم أبدا عما يضايقك ، عن افكارك ، عن مشاعرك ، عن مشاكلك ، ليس لانك لا تجيد الكلام  ، ولكن لأنك تحتاج لشخص ما يشبهك وسيفهم كل كلمة تخرج منك بمعناها الحقيقى ، سيتحيز لوجهة نظرك ويدعمك أو يناقشك فيه بأحترام ليثنيك عنها او يطرح لك بديلا ..

الصداقة ذلك الشىء النادر الوجود تماما ، لا تجده مع الأب أو الأم أو الأخ او الأخت أو الأولاد ، خاصة إذا كنت شخصا يتمتع ببعض المسئولية ، فأنت لا تريد أن تشكو للأب فيتوتر أو تحكى للأم فتنصح أو تشرك أولادك وتشعرهم بهم قد لا يستوعبونه ، فأنت تريد أن تكون للاخ أو الأخت سندا ومعينا وليس شكاءا حكاءا حزينا ، هو الصديق فقط الوحيد الذى يستوعب تلك العلاقة ، كان لى زمان صديق يقرأ أفكارى ويعرف همومى ويتمنى سعادى ولكنى  لم أجد مثله حتى الأن .

لذلك يا أصدقائى لأننى لطالما تحدثت إليكم ، أهدى لكم أخر أعمالى وهى روايتى الجديدة " سنين ومرت " التى صدرت هذا الاسبوع عن دار"الدار" لصاحبها الفنان التشكيلى محمد صلاح مراد ، وستكون فى المكتبات مع بداية الاسبوع القادة ، وأنشالله وقت تحديد حفل التوقيع سأعلنه لكم ، أحبكم .

ولأبنة عمرى وروحى ، وشريكة ايام الكتابة ، وملهمتى الحقيقية بكل ما فيها من ابداع ، ابنتى نهى ، أحبك ، لولا محبتك وصخبك وابتسامتك فى حياتى ، ما احببت اى شىء فى هذه الحياة .